«Астана» футбол клубың маңызды мәлімдеме жасады

«Астана» футбол клубы командадағы қаржылық мәселелердің шешілгенін хабарлады.

Елордалық клубтың мәліметінше, қалыптасқан жағдайды реттеуге ҚР Туризм және спорт министрі, клуб құрылтайшысы және команданың болашағына алаңдайтын азаматтар атсалысқан.

Клуб басшылығы қиын кезеңде қолдау көрсеткен жандарға алғыс білдірді. Сонымен қатар футболшылар мен жаттықтырушылар штабына, сондай-ақ клубтың барлық қызметкеріне кәсіби міндеттерін жалғастырғаны үшін ризашылығын жеткізді.

«Астана» қаржылық қиындықтарға қарамастан, команда өз жұмысына жауапкершілікпен қарап, елорда мен Қазақстан футболының намысын қорғауды жалғастыратынын атап өтті.

Енді клуб маусымның қалған бөлігіндегі басты мақсаттарға және алаңдағы нәтижеге басымдық бермек.

Айта кетейік, бұған дейін «Астана» футболшылары төлемдердің ұзақ уақыт кешіктірілуіне байланысты клуб басшылығына ұжымдық хат жолдаған еді. Ойыншылар чемпионаттың қалған матчтарына бойкот жариялау мүмкіндігін де айтқан. Кейін клуб футболшылар алдында берешегі бар екенін растады.

Енді «Астана» Премьер-лиганың 26-туры аясында «Ордабасымен» ойнайды. Командалар 12 қыркүйекте Шымкентте кездеседі. Ойын сағат 19:00-де басталады.

Қазіргі таңда «Ордабасы» турнир кестесінде екінші орында тұр. «Астана» үшінші сатыда келеді.

Біздің серіктес: Sport12kz