«Тобыл» жеңісі үшін 30 млн сыйақы алады

«Тобыл» клубының жаңа иесі, кәсіпкер Әлішер Ходжаназаров «Қайратты» 4:1 есебімен жеңген команда ойыншыларына 30 миллион теңге сыйақы берілетінін мәлімдеді, деп хабарлайды Sport12.kz.

«Мұндай жетістіктер міндетті түрде басшылық пен құрылтайшылар тарапынан ескерілуі керек. Кеше біз командаға бірден 30 миллион теңге сыйақы берілетінін жарияладық. Мұны камераға түсірмедік, бірақ киім ауыстыратын бөлмеде ойыншылардың қуанышы ерекше болды.

Бұл өте маңызды. Өйткені ойыншылар бар күшін салған кезде олардың еңбегін бағалау қажет. Меніңше, мемлекеттік басқару мен жеке бизнестің айырмашылығы да осында. Жеке бизнес мұндай ұсақ-түйекке дейін түсінеді», — деді кәсіпкер.

Еске салайық, бұған дейін қостанайлық клуб ресми түрде Әлішер Ходжаназаровтың меншігіне өткен болатын. Брифинг барысында клубтың жаңа президенті де тағайындалды. Бұл қызметке Ходжаназаровтың кеңесшісі Айдос Дүйсенбиев келді.

ҚПЛ-дың 26-туры аясындағы матчта «Тобыл» Алматыда «Қайратты» 4:1 есебімен жеңді.

Біздің серіктес: Sport12kz