ҚФФ мен ARGYMAQ ынтымақтастық туралы меморандумға қол қойды

Қазақстан футбол федерациясы мен отандық киім бренді ARGYMAQ ынтымақтастық туралы меморандумға қол қойды. Құжатқа ҚФФ Бас хатшысы Скотт Манн және компания директоры Сүлеймен Задин қол қойды, деп хабарлайды Sport12.kz.

Келісім ұлттық мәдениет пен құндылықтарды кеңінен насихаттауға, ұлттық бірегейлікті нығайтуға және заманауи қазақтың ұлттық киімін елдің мәдени мұрасының маңызды бөлігі ретінде танытуға бағытталған.

Ынтымақтастықтың негізгі бағыттарының бірі – Қазақстан ұлттық футбол құрамасының халықаралық сырт алаңдағы матчтары кезінде ресми киім үлгісіне дәстүрлі шапан элементтерін енгізу.

Тараптар сондай-ақ жастар, футбол академияларының тәрбиеленушілері мен жанкүйерлер арасында ұлттық мәдениетті насихаттауға бағытталған бірлескен имидждік және медиа жобаларды жүзеге асыруды жоспарлап отыр.

ARGYMAQ – заманауи дизайнды, жоғары сапалы материалдарды және ұлттық айдентика элементтерін үйлестіретін отандық киім және аксессуарлар бренді.

ҚФФ мен ARGYMAQ арасындағы ынтымақтастық Қазақстан ұлттық құрамасының халықаралық аренадағы өзіндік стилін айқындап, сонымен қатар заманауи қазақ мәдени мұрасын шетелдік аудиторияға таныстыруға мүмкіндік береді.

Бұл серіктестік футболдың спорт, мәдениет және заманауи отандық бірегейлікті тоғыстыратын маңызды алаң бола алатынын көрсететін тағы бір мысал болмақ.

Біздің серіктес: Sport12kz