Қазақстанның жастар құрамасы Англияға келді

Қазақстанның футболдан жастар құрамасы (U-21) Англияға келді. Команда Еуропа чемпионаты-2027 іріктеу кезеңіндегі алдағы матчтарға дайындалады, деп хабарлайды Sport12.kz.

Құрама дайындықтың алғашқы кезеңін Хай-Уиком қаласында өткізеді.

Еске салайық, Қазақстан U-21 құрамасы іріктеу кезеңіндегі соңғы үш матчын сырт алаңда өткізеді. 25 қыркүйекте Вулверхэмптонда Англиямен кездессе, 29 қыркүйекте Коркте Ирландияға қарсы ойнайды. Одан кейін команда Молдоваға аттанып, дайындықты сол елде жалғастырады. 6 қазанда Ниспорен қаласында Молдова құрамасымен матч өткізеді.

Англияға қарсы ойын алдында Қазақстан құрамасы төрт ұпаймен D тобында алтыншы орында тұр. Англия 19 ұпаймен топ көшін бастап келеді.

Команданың Англияға келген сәтінен түсірілген видеоны төменнен көруге болады.

Біздің серіктес: Sport12kz