Отандық төрешілер халықаралық матчтарға тағайындалды

Отандық төрешілер корпусының өкілдері УЕФА аясында өтетін матчтарға бірден үш мәртебелі тағайындау алды, деп хабарлайды Sport12.kz.

Қазақстандық мамандарға жастар арасындағы Еуропа чемпионатының (U-21) іріктеу кезеңі, УЕФА Ұлттар лигасы және әйелдер арасындағы Чемпиондар лигасының ойындарында қызмет ету сеніп тапсырылды.

Болат Сәриев бастаған толықтай қазақстандық төрешілер бригадасы 2027 жылғы жастар арасындағы Еуропа чемпионатының іріктеу кезеңі аясындағы Сан-Марино – Испания құрамалары арасындағы матчқа қызмет көрсетеді. Кездесу 1 қазанда Серравалле қаласындағы «Стадио Сан-Марино» стадионында өтеді. Болат Сәриевке Юрий Тихонюк пен Денис Лабашов көмектеседі. Қосалқы төреші қызметін Данил Горда атқарады. Айта кетерлігі, қазақстандық төрешілер бригадасының тағайындалуы Испания корольдік футбол федерациясының ресми ресурстарында ерекше атап өтілді.

Ал әйелдер арасындағы Чемпиондар лигасында отандық футбол үшін тарихи оқиға орын алды. Татьяна Сорокопудова италиялық «Рома» мен испаниялық «Барселона» арасындағы матчқа бейнеассистент төреші (AVAR) ретінде тағайындалды. Кездесудің бас төрешісі Кирсти Доул болса, бейнеассистент төреші (VAR) қызметін Питер Бэнкс атқарады. Осылайша, Қазақстаннан шыққан әйел төреші алғаш рет УЕФА-ның ресми клубтық турнирі аясындағы матчта VAR бригадасының құрамына енді.

Сонымен қатар ҚФФ Төрешілік және қадағалау департаментінің директоры Нуно Каштру 2026/27 жылғы УЕФА Ұлттар лигасының топтық кезеңіндегі үшінші тур аясында өтетін Грекия – Нидерланд құрамалары арасындағы матчқа УЕФА инспекторы ретінде тағайындалды. Бұл кездесуге Марко Гуида бастаған италиялық төрешілер бригадасы қызмет көрсетеді. VAR жүйесінде Даниэле Киффи мен Валерио Марини жұмыс істейді.

Біздің серіктес: Sport12kz