«Реалдың» басты жұлдызы «Барселонаға» қарсы матчта алаңға шықпауы мүмкін

«Реал Мадрид» шабуылшысы Винисиус Жуниор тәртіптік жазаға байланысты «Барселонаға» қарсы матчқа қатыспай қалуы мүмкін. Бұл туралы испаниялық COPE порталы хабарлады.

Бразилиялық футболшы 10 қазанда «Вильярреалға» қарсы өткен Испания чемпионатының матчында алаңнан қуылды. Ол қарсылас ойыншысының шашынан тартқаны үшін қызыл қағаз алды. Матч мадридтік клубтың 1:0 есебімен жеңісімен аяқталды.

Төреші хаттамасында Винисиустың алаңнан қуылғаннан кейін де шешімге наразылық білдіріп, агрессивті әрекет танытқаны жазылған. Осыған байланысты тәртіптік комитет футболшыға қосымша жаза тағайындауы ықтимал.

Егер Винисиус бірнеше матчқа шеттетілсе, ол 25 қазанда өтетін «Барселонаға» қарсы ойынға қатыспайды. Алайда футболшыға қатысты түпкілікті шешім әзірге жарияланған жоқ.

Айта кетейік, Испания чемпионатының турнирлік кестесінде «Барселона» көш бастап тұр. Ал «Реал Мадрид» үшінші орында келеді.

Біздің серіктес: Sport12kz