Қазақстан құрамасының бас бапкері Ирландиядан жеңілгеннен кейін пікір білдірді

Қазақстан әйелдер құрамасының бас бапкері Бегайым Қырғызбаева 2027 жылғы әлем чемпионаты іріктеуінің плей-офф кезеңінде Ирландиядан жеңілгеннен кейін команданың ойынына баға берді.

Қарымта матч Ирландияның Корк қаласында өтіп, алаң иелерінің 4:0 есебімен жеңісімен аяқталды. Бұған дейін Астанада өткен алғашқы ойында да Қазақстан құрамасы 0:8 есебімен ұтылған еді. Екі матчтың қорытындысы бойынша ирландиялықтар 12:0 есебімен басым түсті.

Бегайым Қырғызбаеваның айтуынша, қазақстандық футболшылар алғашқы таймда қарсыластың шабуылдарына төтеп беруге тырысқан. Алайда үзіліс алдындағы голдан кейін команда бірнеше қателік жіберген.

«Бірінші таймның көп бөлігінде қарсыласты тежеп, ұйымшыл ойнауға тырыстық. Бірақ үзіліс алдында гол жіберіп алдық. Бұл бізге ауыр тиді. Мұндай матчтар ойынның соңына дейін зейінді жоғалтпау керектігін көрсетеді.

Екінші таймда бірнеше қателікке жол бердік. Қарсыласымыз осы мүмкіндіктерді тиімді пайдаланды. Мұндай деңгейдегі командалар қателіктерді кешірмейді», – деді бас бапкер.

Сондай-ақ маман қарсыластар арасындағы деңгей айырмашылығына тоқталды. Ирландия әйелдер құрамасы Ұлттар лигасының А дивизионында өнер көрсетсе, Қазақстан С дивизионында ойнайды. ФИФА рейтингінде Ирландия 21-орында, ал Қазақстан 98-сатыда тұр.

«Екі команданың арасында үлкен айырмашылық бар. Ирландия А лигасында, біз С лигасында ойнаймыз. Рейтингте де арақашықтық айтарлықтай. Дегенмен даму үшін осындай мықты қарсыластармен кездесуіміз керек», – деді Қырғызбаева.

Осылайша, Қазақстан құрамасы екі ойынның нәтижесі бойынша Ирландиядан 0:12 есебімен жеңіліп, 2027 жылғы әлем чемпионатына іріктеудегі күресін аяқтады.

Біздің серіктес: Sport12kz