«Тараз» Бірінші лигада ірі есеппен жеңіске жетті

Футболдан Қазақстан Бірінші лигасының 25-туры аясында «Тараз» Ақтаудың «Каспий М» командасын 5:0 есебімен жеңді.

Есеп 27-минутта ашылды. «Каспий М» футболшысы Нұржан Силаған Бауыржан Байтана берген допты абайсызда өз қақпасына енгізіп алды.

Екінші таймда тараздықтар тағы төрт гол соқты. 50-минутта Бауыржан Байтана алыстан дәл соққы жасап, есепті еселеді. Араға аз уақыт салып, Нариман Асубек баспен гол соқты. 65-минутта Байтана дубль авторы атанса, төреші қосқан уақытта Жасұлан Молдақараев матчтың қорытынды есебін белгіледі.

Осы жеңістен кейін «Тараз» 34 ұпаймен турнир кестесінде алтыншы орынға көтерілді. Ал «Каспий М» 28 ұпаймен оныншы сатыда қалды.

Бірінші лиганың соңғы турында «Тараз» сырт алаңда «Батырмен» кездессе, «Каспий М» Алматыда «Хан-Тәңіріні» қабылдайды. Екі ойын да 22 қазанда Астана уақытымен сағат 14:00-де басталады.

Біздің серіктес: Sport12kz