«Қайрат» легионері «Панатинаикосқа» қарсы матчтағы мақсатты атады

Алматылық «Қайрат» клубының орталық жартылай қорғаушысы Яакко Оксанен Қазақстан Премьер-лигасының 23-туры аясында павлодарлық «Ертісті» 5:0 есебімен жеңген матчқа баға беріп, Конференция лигасындағы алдағы ойынға қатысты пікір білдірді, деп хабарлайды Sport12.kz.

Оксаненнің айтуынша, кездесудегі басты артықшылықтың бірі — ерте соғылған гол. Оның сөзінше, жылдам гол қарсыласты шабуылға шығуға мәжбүрлеп, алаңда қосымша мүмкіндіктер туғызады.

«Бүгінгі матчтың алдыңғы лига ойынынан басты айырмашылығы — біз ерте гол соқтық деп ойлаймын. Жылдам голдан кейін қарсылас шабуылға шығуға мәжбүр болады. Сол кезде тағы гол соғуға мүмкіндік беретін бос кеңістік пайда болады. Бүгін біз дәл осыны жүзеге асырдық. Бес гол — өте жақсы нәтиже», — деді футболшы.

Ол сондай-ақ Конференция лигасының жалпы кезеңіндегі грекиялық «Панатинаикосқа» қарсы кездесудің маңыздылығын атап өтті. Оксаненнің пікірінше, өз алаңындағы ойындарда ұпай жинау ерекше маңызды.

«Үйдегі матчтар ең маңыздысы. Қонақта «Ригаға» қарсы бір ұпай алу — жақсы бастама. Бірақ өз алаңымызда мықты ойнап, қарсыластан ұпай алуымыз керек», — деді Оксанен.

Айта кетейік, ҚПЛ-дің 23-туры аясында «Қайрат» өз алаңында «Ертісті» 5:0 есебімен ойсырата жеңіп, турнир кестесіндегі екінші орнын нығайтты. Ал 22 қазанда алматылық клуб Конференция лигасының екінші турында Орталық стадионда «Панатинаикосты» қабылдайды.

Біздің серіктес: Sport12kz