Отандық мамандар УЕФА еурокубок матчтарына тағайындалды

Қазақстаннан үш маман - Олжас Абраев, Александр Кеплин және Аян Әлжанов 2026/27 жылғы маусымдағы УЕФА клубтық турнирлерінің негізгі кезеңіндегі матчтарға тағайындалды, деп хабарлайды Sport12.kz.

Олжас Абраев УЕФА Чемпиондар лигасының «Фенербахче» (Түркия) мен «Славия» (Чехия) арасындағы матчында УЕФА делегаты қызметін атқарады. Кездесу 20 қазанда Түркияның Ыстамбұл қаласындағы «Шюкрю Сараджоглу» стадионында өтеді. Олжас Абраев 2013 жылдан бері УЕФА матчтарының делегаты, ал 2016 жылдан бастап ФИФА матч комиссары болып жұмыс істейді.

Қазақстан футбол федерациясы бас хатшысының орынбасары Александр Кеплин УЕФА Еуропа лигасындағы «Арарат-Армения» (Армения) мен «АЗ Алкмаар» (Нидерланд) арасындағы матчқа делегат болып тағайындалды. Ойын 22 қазанда Арменияда өтеді. Александр Кеплин 2018 жылдың наурыз айынан бері УЕФА матчтарының делегаты қызметін атқарып келеді.

Ал Қазақстан футбол федерациясының халықаралық департаментінің директоры Аян Әлжанов УЕФА Конференция лигасындағы «Иберия» (Грузия) мен «Мьельбю» (Швеция) арасындағы матчта делегат болады. Кездесу 22 қазанда Тбилисидегі Михаил Месхи атындағы стадионда өтеді.

Матч делегаты - жарыс кезінде УЕФА-ның ресми өкілі. Оның міндетіне матч алдындағы ұйымдастыру жиналыстарын өткізу, турнир регламентінің сақталуын, стадиондағы және оның сыртындағы қауіпсіздік талаптарын бақылау, сондай-ақ ойынға дейін, матч барысында және кездесуден кейінгі ұйымдастыру жұмыстарына қатысу кіреді.

Матч аяқталған соң делегат УЕФА-ға ойынның өтуі және белгіленген талаптардың орындалуы туралы есеп береді.

Қазақстандық үш маманның УЕФА-ның үш клубтық турниріндегі матчтарға қатар тағайындалуы - отандық футбол мамандарына деген сенімнің және олардың халықаралық деңгейдегі тәжірибесінің жоғары екенін көрсетеді.

Біздің серіктес: Sport12kz