«Ақтөбе» өрескел баннер ұстаған жанкүйерлердің айыппұлын төеп береді

«Ақтөбе» футбол клубы Қазақстан Премьер-лигасы 23-турында «Ордабасымен» кездесуде өрескел әрекетімен көзге түскен жанкүйерлерге салынған айыппұлды төлеп беретін болды, деп хабарлайды Sport12.kz.

Бұл жөнінде клубтың баспасөз қызметі мәлім етті.

- Айыппұл алған алты аруымыздың да шығынын «Ақтөбе» футбол клубы толықтай өтеп береді. Қаракөздеріміз қателескен тұсын толықтай түсінді. Алдағы уақытта да командаға қолдау білдіріп, келесі жолы бәрі «ережеге сай» болады деп уәде берді, - деп жазылған хабарламада.

Сондай-ақ клуб басшылығы қашанда футбол әлеміне құрметпен қарау қажет екенін ескертті.

- Біз – «Ақтөбе» футбол клубы қашан да футбол әлеміне үлкен құрметпен қарайтын, жанкүйерлері мен футболшылары әр ұлт пен нәсілге құрмет көрсете білетін, ауызбіршілігі мол ұжымбыз. Біздің команда – ұлтаралық достықтың айқын дәлелі. Жекелей алған жандардың өз көзқарасы – клубтың позициясы болып есептелмейді. Футбол – алауыздықтың емес, бірліктің алаңы. Әрбір жанкүйерді клубтың абыройын сақтап, өзара сыйластық пен спорттық әдепті ұстануға шақырамыз, - деп толықтырды олар.

Бұл кездесуде ақтөбелік клуб қарсыласына 1:3 есебімен есе жіберді.

Біздің серіктес: Sport12kz