ҚПЛ: «Ордабасы» қатарынан екінші мәрте жеңіске жетті

Шымкенттік «Ордабасы» футболдан Премьер-лига командалары арасындағы Қазақстан чемпионатында қатарынан екінші мәрте жеңіске жетті, деп хабарлайды Sport12.kz. 

Шымкенттік команда алтыншы турда өз алаңында түркістандық «Тұранды» қабылдаған еді. 

Биылғы біріншілікті олар сәтсіз бастады, Алғашқы төрт турда жеңіске жете алған жоқ. Салдарынан соңғы орындардың бірін місе тұтты. Өткен турда «Жетісуды» жеңген олар бұл турда да үш ұпай олжалауға күш салды. 

Кездесу барысында шымкенттік клуб сапынан Мораэс Эвертон 44-минутта мергендік танытты. 

Осылайша «Ордабасы» қарсыласынан 1:0 есебімен басым түсіп, турнир кестесінде сегіз ұпаймен сегізінші орынға көтерілді.

Бүгін тағы бір кездесуде петропавлдық «Қызылжар» қызылордалық «Қайсарды» 2:1 есебімен тізе бүктірді. 

Дәл қазір «Қайрат» (Алматы) пен «Тобыл» (Қостанай) кездесуінің бірінші кезеңі аяқталды. Әзірге алматылық клуб 1:0 есебімен басым түсіп жатыр.

Сондай-ақ 26 сәуірде «Астана» «Атыраудан» 2:1, «Ақтөбе» жезқазғандық «Ұлытаудан» 1:0, семейлік «Елімай» талдықорғандық «Жетісудан» 3:0 есебімен басым түссе, «Оқжетпес» (Көкшетау) пен «Жеңіс» (Астана) 1:1 есебіне қанағат білдірді.

Біздің серіктес: Sport12kz