«Торпедо» Дмитрий Бреустың жалақысын жариялады

«Торпедо» клубымен жаңа келісімшартқа қол қойған Қазақстан құрамасының қорғаушысы Дмитрий Бреустың жалақысы жарияланды.

Төменгі Новгород клубы 25 шілдеде 22 жастағы хоккейшімен екі жылдық біржақты келісімшарт жасалғанын ресми түрде хабарлаған еді. Бұған дейін оның келісімі екіжақты болып, 2027 жылға дейін жарамды болған.

Мәліметке сәйкес, Бреус жаңа келісімнің алғашқы маусымында 8 миллион рубль, ал екінші маусымында 10 миллион рубль жалақы алады.

Алматыда дүниеге келген қорғаушы хоккейдегі алғашқы қадамдарын павлодарлық «Ертіс» клубында бастаған. Ол 2023 жылдан бері «Торпедо» жүйесінде өнер көрсетіп келеді. Сондай-ақ «Чайка» құрамында МХЛ, ал «Торпедо-Горький» сапында ЖХЛ чемпионы атанған.

Өткен маусымда Дмитрий Бреус жалға алу келісімімен «Барыс» сапында ойнап, ҚХЛ тұрақты чемпионатында 64 матч өткізіп, 1 гол және 9 нәтижелі пас берді. Сонымен қатар Қазақстан құрамасы сапында әлем чемпионатына қатысып, бес кездесуде екі шайба соқты.

Біздің серіктес: Olimpbet қосымшасын пайдалан