«Барыс» Башқұртстан Республикасы кубогына қатысады

Астаналық «Барыс» 17-20 тамыз аралығында Ресейдің Уфа қаласында өтетін Башқұртстан Республикасы кубогы турниріне қатысады, деп хабарлайды Sport12.kz.

Команда құрамындағы қазақстандық хоккейшілер 15 шілдеде елордаға жиналды. Олардың қатарында қақпашы Владислав Нурек, қорғаушылар Бейбарыс Оразов, Артём Королёв пен Кирилл Никитин, шабуылшылар Всеволод Логвин, Кирилл Ляпунов, Семён Симонов, Абзал Әлібек және Асанәли Саркенов бар.

Хоккейшілер жаттығу процесін бастап, мұз айдынындағы алғашқы жаттығуын өткізді. 1 тамыздан кейін олардың қатарына тағы бірнеше ойыншы қосылды.

Айналмалы жүйе бойынша ұйымдастырылатын жарысқа алаң иесі «Салават Юлаев» (Уфа), «Амур» (Хабаровск), «Лада» (Тольятти) және қазақстандық «Барыс» қатысады.

«Барыстың» ойын кестесі:

17 тамыз, 19:00 «Салават Юлаев» – «Барыс».

18 тамыз, 15:00 «Барыс» – «Амур».

20 тамыз, 13:00 «Лада» – «Барыс».

Одан кейін Михаил Кравецтің шәкірттері сол елдің Санкт-Петербург қаласында жалауын көтеретін Николай Пучков атындағы турнирде бақ сынайды. Команданың 2026/27 жылғы ҚХЛ маусымына дайындықтың қорытынды кезеңі 31 тамыз-6 қыркүйек аралығында «Барыс Аренада» өтеді.

Біздің серіктес: Sport12kz