Шайбалы хоккейден Қазақстан Кубогінің жартылай финалистері анықталды

Шайбалы хоккейден Қазақстан Кубогының биылғы маусымында жартылай финалға жолдама алған командалар белгілі болды.

Биылғы турнирге 10 команда қатысып, олар өткен маусымдағы көрсеткіштеріне қарай екі топқа бөлінген. «А» тобындағы ойындар Өскеменде, ал «В» тобындағы матчтар Қарағандыда өтті.

Өскемендегі топта «Торпедо» төрт матчтың барлығында жеңіске жетіп, бірінші орынмен плей-оффқа шықты. Екінші сатыны алты ұпай жинаған «Ақтөбе» иеленді.

Қарағандыда өткен «В» тобында жергілікті «Сарыарқа» жеті ұпаймен көш бастады. Ал алты ұпайы бар Рудныйдың «Горняк» командасы екінші орынға жайғасты.

Осылайша, Қазақстан Кубогының жартылай финалында топ жеңімпаздары қарсы топтың екінші орын алған командаларымен кездеседі.

Жартылай финалдық жұптар:

• «Торпедо» – «Горняк»;

• «Сарыарқа» – «Ақтөбе».

Шешуші ойындар 24 тамызда Қарағандыда өтеді. Жартылай финалдан сүрінбей өткен екі команда кейін турнирдің финалында бас жүлде үшін таласады.

Айта кетейік, Қазақстан Кубогының қазіргі иегері – Өскеменнің «Торпедо» командасы.

Біздің серіктес: Sport12kz