«Барыс» Санкт-Петербургте алғашқы матчын өткізеді

Астаналық «Барыс» Санкт-Петербургте Николай Пучков атындағы турнирдегі алғашқы матчын СКА командасына қарсы өткізеді, деп хабарлайды Sport12.kz.

СКА жаңа маусым алдындағы құрамын айтарлықтай жаңартты. Команда сапына Захар Бардаков, Василий Глотов, Данил Аймурзин, Василий Атанасов, Алексей Маклюков және Владислав Семин қосылды.

Турнирге дейін Игорь Ларионов шәкірттері «Автомобилистпен» екі бақылау матчын өткізіп, екеуінде де жеңіске жетті — 3:1 және 5:4.

«Барыс» бұған дейін Уфадағы Башқұртстан Республикасының кубогына қатысты. Астаналық клуб «Ладаны» 2:1 есебімен жеңіп, «Салават Юлаевқа» (1:4) және «Амурға» (1:5) жол берді. Чейз Приски турнирдің үздік қорғаушысы атанды.

Санкт-Петербургке командамен бірге жаңа шабуылшы Джастин Бэйли де барды. Ол бүгін «Барыс» сапында алғаш рет мұз айдынына шығуы мүмкін. Сондай-ақ медициналық себептерге байланысты Уфадағы турнирге қатыспаған Алихан Асетов те команда құрамында.

СКА — «Барыс» матчы Қазақстан уақытымен 21:00-де басталады.

Біздің серіктес: Sport12kz