Ресейлік БАҚ: «Барысты» тоқтату мүмкін емес

Ресейдің «Чемпионат» басылымының шолушысы Максим Макаров Астананың «Барысы» ҚХЛ тұрақты чемпионатында «Салават Юлаевты» 8:6 есебімен жеңген матчын талдап, қазақстандық клубтың маусымды бастауына жоғары баға берді, деп хабарлайды Sport12.kz.

«Бұл ессіздерді тоқтату мүмкін емес! «Барыс» ҚХЛ-дың мықты рекордын қайталады», — деп жазды автор мақаласының тақырыбында.

Журналист маусым басталар алдында «Барысқа» қатысты үлкен үміт болмағанын атап өтті. Сарапшылардың басым бөлігі астаналық клубты плей-оффқа өтпейді деп болжаған.

«Бірақ алғашқы кездесуде «Барыс» көпшілікті таңғалдырды. Астаналықтар матчты жақсы бастап, «Сибирьді» бірінші кезеңде-ақ бар күшін жұмсауға мәжбүр етті. Ал екінші кезеңде әлсіреген қарсыласын сенімді түрде жеңді.

Рас, сол матчта «Барыстың» мүмкіндіктерді өте тиімді пайдаланғанын атап өткен жөн. Команда іс жүзінде әр мүмкіндігін голға айналдырды. Осыдан кейін мұндай нәтиже қайталанбайды деп күтуге болатын еді.

Бірақ олай болмады. Керісінше, «Барыс» келесі кездесуде бұдан да көп шайба соқты», — деп жазды Макаров.

Автордың айтуынша, «Салават Юлаевқа» қарсы кездесуде «Барыс» алғашқы кезеңде төрт шайба соқты. Томпсон мен Морелли маусымдағы алғашқы голдарын соқса, Бэйли мен Приски нәтижелі серияларын жалғастырды.

«Эйфорияға берілген алаң иелері екінші кезеңге мүлде басқа көңіл күймен шықты. Бақытымызға қарай, легионерлердің шеберлігі «Барысқа» кезеңді тең есеппен аяқтауға мүмкіндік берді. Томпсон дубль жасаса, Логан Дэй қақпашының иығының үстінен дәл соққы жасап, тамаша гол соқты.

Үшінші кезеңде тағы екі шайба соққанына қарамастан, «Барыс» «Салават Юлаевқа» ойынға қайта оралуға мүмкіндік берді. Уфалықтар үшін екі шайба айырмасы үлкен кедергі болған жоқ. Алайда астаналықтар жеңісті уысынан шығармады», — деп жазды шолушы.

Матчтан кейін «Барыстың» бас бапкері Михаил Кравец ойынға көңілі толмағанын жасырмады. Ол флеш-интервьюде тек бірінші кезеңге және екінші кезеңнің басына риза болғанын айтты. Сондай-ақ киім ауыстыратын бөлмеде ойыншылармен маңызды әңгіме өткізген. Оның пікірінше, мықты команда мұндай жағдайға жол бермеуі керек.

Соған қарамастан, Макаров «Барыстың» маусымды өте жоғары қарқынмен бастағанын атап өтті.

«Бірақ бір нәрсе анық — «Барыс» чемпионатты өте қарқынды бастап жатыр! Әзірге оларды тоқтату мүмкін емес.

Сонымен қатар Қазақстан командасы ҚХЛ-дың айтулы рекордын қайталады. Бұған дейін маусымның алғашқы екі кездесуінде 15 шайба соққан жалғыз команда «Барыс» болған. Бұл 2013/14 жылғы маусымда тіркелген. Сол кезде астаналықтар «Северсталь» қақпасына 10, ал «Локомотивке» бес шайба соққан. Сол тұрақты чемпионаттың қорытындысы бойынша команда Шығыс конференциясында екінші орын алды», — делінген мақалада.

Айта кетейік, «Барыс» келесі матчын 12 қыркүйекте өз алаңында хабаровскілік «Амурға» қарсы өткізеді.

Біздің серіктес: Sport12kz