«Барыс» ҚХЛ көшбасшысын 5:0 есебімен ойсырата жеңді

Астаналық «Барыс» Құрлықтық хоккей лигасының тұрақты чемпионатында кезекті жеңісіне қол жеткізді. Елордалық команда сырт алаңда Ярославльдің «Локомотивін» 5:0 есебімен тізе бүктірді.

«Барыс» кездесудің алғашқы минуттарынан белсенді ойнап, бірінші кезеңде екі шайба соқты. Джейк Масси мен Логан Дэй қарсылас қақпашысын қапы қалдырып, командасын 2:0 есебімен алға шығарды.

Екінші кезеңде астаналық клуб тағы екі рет мергендік танытты. Алдымен Джастин Бэйли есепті 3:0-ге жеткізсе, кейін Ансар Шайхмедденов төртінші шайбаны соқты.

Үшінші кезеңде «Барыс» басымдығын сақтап қалды. Семен Симонов кездесудің соңғы минуттарында бесінші шайбаны қақпаға енгізіп, матчтың нүктесін қойды.

Осылайша, «Барыс» «Локомотивті» 5:0 есебімен жеңіп, ярославльдік команданың қатарынан алты матчқа созылған жеңіс сериясын үзді.

Елордалық клуб келесі ойынын 22 қыркүйекте өткізеді. Бұл кездесуде «Барыс» Мәскеудің «Динамосына» қарсы ойнайды.

Біздің серіктес: Sport12kz