Шайбалы хоккейден әйелдер арасында Қазақстан чемпионаты қашан басталады?

Қазақстан хоккей федерациясының Республикалық жарыстарды өткізу департаменті 2026/27 жылғы Қазақстан әйелдер чемпионатының күнтізбесін жариялады., деп хабарлайды Sport12.kz.

Алдағы чемпионатта Қазақстан чемпионатының жүлделері үшін алты команда таласады. Олар: «Томирис», «Айсұлу», «Торпедо», «Грация», «Жұлдыз» және «Алматы». Өткен маусымдағыдай, командалар жекелеген турлар аясында емес, Pro және Jastar Ligasy чемпионаттарындағы тәртіп бойынша өз алаңында және сырт алаңда ойындар өткізеді.

Чемпионат екі кезеңнен тұрады. Бірінші кезеңде, яғни тұрақты чемпионатта, әр команда 20 ойыннан өткізеді. Одан кейін үздіктер анықталып, финалдық кезеңге жолдама алады.

Бірінші кезең 24 қазанда басталады. Осы күні Алматыда өткен маусымның финалистері «Айсұлу» мен «Томирис» кездеседі. «Томирис» үшін тұрақты чемпионаттағы соңғы ойын 2 сәуірге жоспарланған. Бұл күні Александр Тебеньковтің ойыншылары «Торпедомен» кездеседі.

13 сәуірде финалдық кезең басталады. Оның қорытындысы бойынша чемпионаттағы командалардың қорытынды орындары анықталады. Үздік төрт команда алдымен жартылай финалда бақ сынайды. Одан кейін үшінші орын үшін және чемпиондық атақ үшін сериялар өтеді.

Плей-офф кезеңіндегі барлық серия екі жеңіске дейін жалғасады.

Еске салсақ, қазақстандық «Барыс» командасы Құрлықтық хоккей лигасындағы кезекті ойынын бүгін, 22 қыркүйекте Ресейде «Динамо» (Мәскеу) командасына қарсы өткізеді.

Біздің серіктес: Sport12kz