ҚХЛ: «Барыс» бүгін елордада СКА командасымен кездеседі

«Барыс» хоккей клубы бүгін, 27 қыркүйекте Құрлықтық хоккей лигасының кезекті ойын күнінде елордада Ресейдің СКА (Санкт-Петербург) командасымен кім мықтыны анықтайды, деп хабарлайды Sport12.kz.

Бұл ойын Қазақстан уақытымен 17:00-де басталып, «Qazsport» телеарнасынан тікелей эфирде көрсетіледі.

Соңғы бес кездесудің барлығында қазақстандық команда қарсыласына есе жіберді. Ал ресейлік клуб бүгінгі кездесуге қатарынан үш жеңіспен келіп отыр.

Жарақатына байланысты екі команда сапынан бүгінгі ойынға қатыса алмайтын хоккейшілер белгілі болды. Олардың қатарында «Барыс» сапынан Мәди Диқанбек болса, СКА құрамынан Линус Вайссбак бар.

Айта кетсек, қазақстандық команда бұдан кейін үш ойынын сырт айдында өткізеді. Алдымен 30 қыркүйекте Ресейде «Ак Барс» (Қазан) клубымен кездессе, одан кейін 2 қазанда «Нефтехимик» (Нижнекамск), 4 қазанда «Спартак» (Мәскеу) командасымен шеберлік байқасады.

Айта кетсек, бұдан бұрын «Барыс» елордада «Нефтехимикке» есе жіберді.

Біздің серіктес: Sport12kz