«Барыс» сырт алаңда қатарынан екінші жеңісіне қол жеткізді

Астаналық «Барыс» Құрлықтық хоккей лигасының тұрақты чемпионатында Мәскеуде «Спартакты» буллиттер сериясында жеңді.

Кездесудің алғашқы кезеңінде командалар есеп аша алмады.

Екінші кезеңде Даниил Гутик «Спартакты» алға шығарды. Алайда көп ұзамай Логан Дэй есепті теңестірді. Артынша Әлихан Әсетов «Барысқа» басымдық сыйлады. Үзіліске дейін Данил Пивчулин есепті 2:2-ге жеткізді.

Үшінші кезеңнің басында Люк Локхарт «Спартакты» қайта алға шығарды. Негізгі уақыттың аяқталуына 1 минут 38 секунд қалғанда Тай Томпсон таразы басын теңестірді.

Қосымша уақытта есеп өзгерген жоқ. Жеңімпаз буллиттер сериясында анықталды. «Барыс» сапынан Гарретт Пилон шешуші соққыны дәл орындап, командасына жеңіс әкелді.

Осылайша «Барыс» сырт алаңдағы қатарынан екінші кездесуінде жеңіске жетті. Бұған дейін астаналықтар «Нефтехимикті» овертаймда 5:4 есебімен ұтқан.

Михаил Кравец шәкірттері келесі кездесуін 10 қазанда Астанада өткізеді. Қарсыласы — Омбының «Авангарды».

Біздің серіктес: Sport12kz