«Барыс» Хантер Шепардқа қатысты тараған ақпаратқа жауап берді

Астаналық «Барыс» клубы америкалық қақпашы Хантер Шепардпен келісімшартты бұзу туралы келіссөздер жүргізіліп жатқаны жөніндегі ақпаратты жоққа шығарды.

Клубтың баспасөз қызметі қақпашының командада қалатынын және әдеттегі режимде жұмысын жалғастырып жатқанын мәлімдеді.

«Хантер Шепардқа қатысты клубтың ресми ұстанымын хабарлаймыз. Қақпашымен келісімшартты бұзу жөнінде ешқандай келіссөз жүргізіліп жатқан жоқ. Ол “Барыстың” ойыншысы болып қала береді. Расталмаған ақпаратты таратпауды сұраймыз», – делінген хабарламада.

Бұған дейін бірқатар БАҚ «Барыс» америкалық легионермен қоштасуды жоспарлап отырғанын жазған еді. Алайда клуб бұл ақпаратты растаған жоқ.

Хантер Шепард осы маусымда Құрлықтық хоккей лигасында 10 матч өткізіп, оның төртеуінде «Барыс» жеңіске жетті. Қақпашы 167 соққыны қайтарды. Оның соққыларды қайтару көрсеткіші – 86,5 пайыз, ал сенімділік коэффициенті – 3,36.

Шепардтың «Барыспен» келісімшарты осы маусымның соңына дейін жарамды.

Біздің серіктес: Sport12kz