Қазақстандық дзюдошылар Венгриядағы Grand Slam турнирінде бақ сынайды

Халықаралық дзюдо федерациясы (IJF) Венгрияның Будапешт қаласында өтетін Grand Slam турниріне қатысатын спортшылардың алдын ала тізімін жариялады.

Қазақстан құрамасы жарыста 15 дзюдошымен сынға түседі. Ел намысын ерлер арасында жеті салмақта 12 спортшы, әйелдер арасында екі салмақта үш спортшы қорғайды.

Ерлер арасындағы 60 келіге дейінгі салмақта Мағжан Шамшадин мен Нұраділ Әлжан татамиге шығады. 66 келіде Ақжігіт Насыр мен Мейірбек Байзақов, 73 келіде Есет Қуанов пен Ерсұлтан Дүйсенхан белдеседі.

81 келіге дейінгі салмақта Қазақстан атынан Досхан Жолжақсынов өнер көрсетеді. 90 келіде Ермахан Әнуарбеков пен Даниил Крылов бақ сынаса, 100 келіде Асқар Біржанов ел намысын қорғайды. Ал аса ауыр салмақта Ғалымжан Қырықбай мен Жантілек Нұртілепұлы жарыс жолына шығады.

Әйелдер арасында 48 келіге дейінгі салмақта Диана Бүркеева өнер көрсетеді. +78 келіде Камила Берліқаш пен Ақерке Рамазанова бақ сынайды.

Будапешттегі Grand Slam турнирі 11-13 қыркүйек аралығында өтеді.

Біздің серіктес: Sport12kz