Оралда дзюдодан Қазақстан чемпионаты өтеді

29 тамыз бен 1 қыркүйек аралығында Орал қаласындағы «Жайық» спорт кешенінде дзюдодан ерлер мен әйелдер арасында Қазақстан чемпионаты өтеді.

Ел біріншілігіне Астана, Алматы және Шымкент қалаларынан, сондай-ақ 17 облыстан 600-ге жуық спортшы қатысады. Балуандар ерлер және әйелдер арасында барлығы 14 салмақ дәрежесінде татамиге шығып, чемпионаттың жүлдесін сарапқа салады.

Орал татамиінде Қазақстан құрамасының сапында халықаралық аренада ел намысын қорғап жүрген тәжірибелі дзюдошылар да өнер көрсетеді. Олардың қатарында Мағжан Шамшадин, Бауыржан Нарбаев, Данияр Шамшаев, Ғалия Тынбаева, Мәди Амангелді, Дидар Хамза, Аружан Ережепова, Камила Берліқаш және Ақерке Рамазанова бар.

Ел чемпионатының нәтижесі 2027 жылғы халықаралық маусым қарсаңында ұлттық құраманы жасақтау кезінде ескеріледі. Сондықтан Оралдағы жарыс спортшылар үшін жүлде ғана емес, ұлттық құрама сапындағы орнын бекіту тұрғысынан да маңызды.

Додада жас дзюдошылардың да шеберлігін сынап, тәжірибелі қарсыластар арасында өздерін көрсетуге мүмкіндігі болмақ.

Біздің серіктес: Sport12kz