Қазақстандық дзюдошылар Лозаннадағы “Гранд-Слам” турнирін небәрі бір жүлдемен аяқтады

Швейцарияның Лозанна қаласында дзюдодан Grand Slam турнирі аяқталды. Қазақстан құрамасы жарысты небәрі бір жүлдемен аяқтады.

Ұлттық құрама сапынан жүлдеге қол жеткізген жалғыз спортшы — Абылайхан Жұбаназар. 81 келіге дейінгі салмақта белдескен қазақстандық дзюдошы барлық қарсыласын жеңіп, финалға өтті.

Шешуші сында Абылайхан Жұбаназар Өзбекстан өкілі Арслонбек Тожиевпен белдесті. Отандасымыз қарсыласынан басым түсіп, Grand Slam чемпионы атанды.

Қазақстан құрамасының тағы үш спортшысы жүлдеге бір қадам қалғанда сүрінді. 60 келіге дейінгі салмақта Шерзод Давлатов қола медаль үшін белдесуде Самариддин Кучкаровтан жеңілді.

66 келіде Ақылжан Жұбатқанов жұбаныш белдесуінде Оңтүстік Корея өкілі Чанён Кимге жол берді. Ал әйелдер арасында 78 келіден жоғары салмақта Аида Тойшыбекова жұбаныш кездесуінде Венесуэла спортшысы Карен Леоннан ұтылды.

Қазақстанның қалған дзюдошылары жарыс жолынан ерте шығып қалды. Олар — Дана Әбдірова (57 келі), Талғат Орынбасар (60 келі), Нұрқанат Серікбаев (66 келі), Ажар Асхат (70 келі), Бақытжан Абдурахманов (73 келі), Аңсарбек Ғайнуллин (73 келі), Аруна Жангелдина (78 келі), Әділет Алмат (81 келі), Айдар Арапов (90 келі), Марат Байқамуров (100 келі) және Ерасыл Қажыбаев (+100 келі).

Осылайша Қазақстан құрамасы Лозаннадағы Grand Slam турнирінде бір ғана жүлдені қанағат тұтты.

Біздің серіктес: Sport12kz