Елдос Сметов Қазақстан құрамасындағы бәсекелестік туралы айтты

Қазақстанның ең титулды дзюдошысы Елдос Сметов Азиада-2026 ойындарындағы өнері және Олимпиада-2028 құрамына ену жолындағы бәсекелестік туралы пікір білдірді, деп хабарлайды Sport12.kz.

Жапонияда өткен Азиада-2026 ойындарында 34 жастағы Елдос Сметов Қазақстан құрамасының ашылу салтанатында ту ұстаушысы атанып, күміс медаль жеңіп алды.

«Әрине, Азиадада алтын алуды жоспарладым. Алайда бұл мақсатқа жете алмадым. Дегенмен, тұғырға көтеріліп, еліміздің туын алып шықтым. Үйге жүлдесіз қайтқан жоқпын. Бұл Азиада мен үшін аса жауапты жарыс болды», — деді Сметов.

Азиада-2026 финалында қазақстандық дзюдошы жапониялық Хаято Кондоға жол берді.

«Әр белдесу мен үшін өзінше қиын болды. Біз аздаған қателіктер жібердік, жаттығуда кей тұстарды толық пысықтамадық. Финалда техникалық және тактикалық кемшіліктермен қатар, жолым да болмады. Ал қарсылас өз елінде, өз татамиінде белдесті. Енді бапкерлермен бірге жарыс қорытындысын жан-жақты талдап, кеткен қателіктерді қарастырамыз», — деді ол.

Сметов елге қайтып келе жатқан кезде оның салмағында өнер көрсететін 24 жастағы Шерзод Давлатовтың әлем чемпионатында күміс медаль алғанын білді. Қазақстандық спортшы 60 келіге дейінгі салмақта бес қарсыласын жеңіп, олардың қатарында әлем чемпионы әрі Париж Олимпиадасының қола жүлдегері жапониялық Рюдзю Нагаяманы да қапы қалдырды.

Осыдан кейін Қазақстан құрамасындағы Олимпиада-2028 жолдамасы үшін бәсекелестік күшейе түсті. Олимпиадада бір елден бір салмақта тек бір спортшы ғана өнер көрсете алады.

«Шерзодтың әлем чемпионатында күміс алғанын ұшақта білдім. Бұл үлкен жетістік. Оны және өзімізді осы жүлдемен құттықтаймын. Ал Олимпиададағы орын маған кепілденген жоқ. Егер құрамадан біреу менен мықты болса, Олимпиадаға сол барады. Бұған реніш болмауы керек. Спортта кім мықты болса, сол жарысқа қатысуы тиіс», — деді Елдос Сметов.

Дзюдошының қазіргі басты мақсаты — 2027 жылы Астанада өтетін әлем чемпионаты. Бұл жарыста Олимпиададан айырмашылығы, бір салмақта бір елден екі спортшыға қатысуға мүмкіндік бар.

«Қазір басты мақсат — өз елімізде өтетін әлем чемпионаты. Үйде алтын алуға тиіспіз. Одан кейін Олимпиада бар. Бірақ оған дейін іріктеу болады. Құрамаға ену үшін көп еңбек ету керек. Менің орным алдын ала кепілденбеген, бәріміз тең жағдайда күресеміз», — деді ол.

Сметов әзірге спорттық мансабын аяқтауды жоспарламайтынын да атап өтті.

«Мен спортты жақсы көремін. Мотивациям өте жоғары», — деп түйіндеді ол.

Біздің серіктес: Sport12kz