Ута Абэні Олимпиада алтынынан айырған өзбек дзюдошысы Ақтауға келеді

17–18 қазанда Ақтауда дзюдодан Азия ашық кубогы ұйымдастырылады. Тұрар Жолдыбаевтың құрметіне өткізілетін халықаралық жарысқа жеті елдің 230 спортшысы қатысады деп күтіліп отыр.

Бәсеке «Халық Арена» спорт кешенінде өтеді. Татамиге Қазақстан, Әзербайжан, Беларусь, Қырғызстан, Черногория, Ресей және Өзбекстан өкілдері шығады.

Турнирге Өзбекстанның Олимпиада чемпионы Диёра Келдиёрова да қатысады. Бұл оның Олимпиада ойындарынан кейінгі алғашқы жарысы болмақ.

Азия ашық кубогы Халықаралық дзюдо федерациясының (IJF) күнтізбесіне енгізілген. Жүлдегерлер әлемдік рейтингке ұпай қосады: чемпионға – 100, күміс жүлдегерге – 70, қола медаль иегеріне 50 ұпай беріледі.

Жарыс бағдарламасы

17 қазан

• Ерлер: 60, 66, 73 келіге дейін.
• Әйелдер: 48, 52, 57, 63 келіге дейін.

18 қазан

• Ерлер: 81, 90, 100 келі және 100 келіден жоғары.
• Әйелдер: 70, 78 келі және 78 келіден жоғары.

Осылайша, Ақтаудағы екі күндік жарыста спортшылар Азия ашық кубогының жүлделерін сарапқа салып, IJF рейтингіндегі көрсеткіштерін жақсартуға мүмкіндік алады.

Айта кетейік, Диёра Келдиёрова Париж Олимпиадасында жапонның атақты дзюдошысы Ута Абэні жарыс жолынан шығарған еді.

Біздің серіктес: Sport12kz