Ербол Мырзабосынов «Болашақ ойындары» жарысын тамашалады

Туризм және спорт министрі Ербол Мырзабосынов Астанада өтіп жатқан «Болашақ ойындары 2026» халықаралық турниріндегі фиджитал-футбол бәсекесін тамашалады. Министр қазақстандық командаларға қолдау көрсетті.

Биылғы жарысқа әлемнің 50 елінен 800 спортшы қатысып жатыр. Қазақстан атынан спорттың сегіз бағыты бойынша 11 команда сынға түсуде.

Жарыс барысында Ербол Мырзабосынов «Болашақ ойындары» еліміз үшін маңызды екенін айтты.

«Мемлекет басшысы Қасым-Жомарт Тоқаевтың бастамасымен жарияланған Цифрландыру және жасанды интеллект жылында бұл турнирдің өтуінің мәні ерекше. «Болашақ ойындары» спорт пен заманауи технологияларды біріктіріп, еліміздің инновациялық даму бағытын айқын көрсетеді.

Турнирге әлем бойынша қызығушылық артып келеді. Бүгінде трансляцияларды көру саны 185 миллионға жетті. Жарыстар 16 тілде көрсетіліп, ондаған халықаралық медиасеріктес пен 100-ден астам стример ақпарат таратуда. Бұл турнирге деген халықаралық қызығушылықтың жоғары екенін көрсетіп, Қазақстанның әлемдік деңгейдегі жарыстарды ұйымдастырушы ел ретіндегі беделін нығайта түседі.

Турнирдің өтуіне үлес қосып жатқан спортшылар мен волонтерлерге алғысымды білдіремін. Командаларымызға сәтті өнер көрсетіп, жаңа жеңістерге жетулерін тілеймін», – деді Ербол Мырзабосынов.

Біздің серіктес: Sport12kz