Әбдірахманов Рафаэль Физиевтің келесі қарсыласын атады

Қазақстандық менеджер Саят Әбдірахманов әзербайжандық файтер Рафаэль Физиевтің UFC-дегі келесі қарсыласы ретінде рейтингі жоғары спортшымен жұдырықтасуды қалайтынын айтты.

Физиев сенбі күні Бакуде өткен UFC Fight Night 280 турнирінде мексикалық Мануэль Торресті екінші раундта нокаутпен жеңген болатын.

Әбдірахмановтың айтуынша, енді олар UFC-мен келіссөз барысында жеңіл салмақтағы үздік ондықтағы қарсыласты талап етеді. Ең ықтимал нұсқалардың бірі – Жаңа Зеландия өкілі Дэн Хукер.

«Бұл Рафа үшін өте маңызды жеңіс болды. Соңғы уақытта жарақаттар мен сәтсіз нәтижелерге байланысты көпшілік оған күмән келтіре бастады. Бірақ мен оның Торрестен мықты екенін, өзіне сенуі керектігін айттым. Соның нәтижесінде бәрі ойдағыдай аяқталды», – деді Әбдірахманов.

Сондай-ақ ол Физиевтің болашақта BMF белдігі үшін де жекпе-жек өткізуі мүмкін екенін жоққа шығармады. Алайда Чарльз Оливейрамен кездесу келесі айқас болмайтынын атап өтті.

Айта кетейік, 33 жастағы Рафаэль Физиев MMA-дегі мансабында 20 жекпе-жек өткізіп, 14 рет жеңіске жетіп, 6 мәрте жеңілген.

Біздің серіктес: Olimpbet қосымшасын пайдалан