Қуат Хамитов Тони Фергюсонмен жекпе-жекке қатысты шешімін айтты

Қазақстандық MMA файтері Қуат Хамитов UFC аңызы Тони Фергюсонмен ықтимал жекпе-жекке қатысты пікір білдірді, деп хабарлайды Sport12.kz.

Хамитовтың айтуынша, күрес лигасы RAF президенті оның Фергюсонмен кездесуі туралы идеяны қолдайды. Алайда америкалық спортшының қазіргі таңда басқа жоспарлары бар.

«Егер ұсыныс түссе, Тони Фергюсонмен RAF аясында күресуге дайынмын. Президентке біздің идеямыз ұнайды. Бірақ Тонидің бокстан көп жекпе-жегі бар. Сондықтан әзірге бұл кездесуді өткізе алмай отырмыз.

Егер жалаң жұдырықпен жекпе-жек бойынша Nomad немесе IBA Nomad тарапынан ұсыныс түссе, оны қуана қабылдаймын. Онымен екі ұйымның да алаңында өнер көрсету маған қызық болар еді. Бұл — таза спорттық қызығушылық. Ол — әлемдік деңгейдегі аңыз, мен — ТМД-дағы аңыз. Екі аңыздың кездесуі қызықты болар еді», — деді Хамитов.

Айта кетейік, Хамитов пен Фергюсон RAF-тағы дебюттік жекпе-жектерін бір қарсыласқа — Арман Царукянға қарсы өткізген. Екеуі де техникалық басымдыққа байланысты жекпе-жекті мерзімінен бұрын аяқтап, жеңіліс тапты.

Фергюсон 13 маусымда АҚШ-тың Сент-Луис қаласында өткен RAF 10 турнирінде Царукянмен кездесіп, 0:10 есебімен жеңілді. Ал Хамитов 11 шілдеде Грузияның Тбилиси қаласында өткен RAF 11 турнирінде Царукянға қарсы шығып, 0:11 есебімен жеңіліс тапты.

Біздің серіктес: Sport12kz