Италиялық маман Қазақстан жастар құрамасының бапкері атанды

Қазақстанның биатлоннан жастар құрамасына италиялық маман Лука Бормолини бапкер болып тағайындалды.

Жаңа бапкер-кеңесшінің басты міндеті — спортшыларды 2030 жылы Француз Альпісінде өтетін қысқы Олимпиада ойындарына дайындау.

Лука Бормолинидің ұлттық, жастар және жасөспірімдер құрамаларымен жұмыс істеуде 12 жылдан астам тәжірибесі бар. Әр жылдары ол Чехия әйелдер құрамасын басқарған, Оңтүстік Кореяның жастар командасымен жұмыс істеген. Сонымен қатар АҚШ, Жаңа Зеландия, Аустралия және Бразилия спортшыларымен де тәжірибе алмасқан.

Италиялық маманның жұмысы үш негізгі бағытқа бағытталады: Grand Tour Biathlon бағдарламасы түлектерін ұлттық құрамаға дайындау, 2030 жылғы Олимпиада дайындық кезеңіне арналған команданы қалыптастыру және қазақстандық бапкерлердің біліктілігін арттыру.

Сондай-ақ Лука Бормолини жергілікті мамандармен халықаралық тәжірибесі мен заманауи дайындық әдістерін бөлісетін болады.

Біздің серіктес: Olimpbet қосымшасын пайдалан