Брисбен-2032 Олимпиадасы мен Паралимпиадасының ресми эмблемалары таныстырылды

2032 жылы Аустралияның Брисбен қаласында өтетін Олимпиада және Паралимпиада ойындарының ресми эмблемалары таныстырылды.

Эмблемалардың негізгі бейнесі ретінде Аустралияда мекендейтін какадудың екі түрі таңдалған. Олимпиада ойындарының белгісінде қызғылт какаду, ал Паралимпиада эмблемасында сары айдарлы какаду бейнеленген.

Дизайнда Квинсленд штатының сұлбасы, Олимпиада және Паралимпиада алауы мен «Brisbane 2032» жазуы қамтылған. Құстардың қауырсындары Аустралияның жазғы Олимпиада ойындарын үшінші рет қабылдайтынын меңзейді.

Какаду бейнесі Аустралияның байырғы халқы үшін де маңызды. Бұл құстар жермен, дәстүрмен және тарихпен байланысты ұғымдарды білдіреді.

Эмблемаларды «Брисбен-2032» ұйымдастыру комитетінің жетекшілігімен жергілікті және халықаралық шығармашылық мамандар әзірлеген. Олар алдағы ойындардың безендірілуінде қолданылады.

Айта кетейік, Брисбендегі Олимпиада ойындары 2032 жылғы 23 шілде мен 8 тамыз аралығында өтеді. Паралимпиада жарыстары 24 тамыздан 5 қыркүйекке дейін жалғасады.

Біздің серіктес: Sport12kz