Спорттық гимнастикадан әлем чемпионатында Қазақстан атынан кімдер бақ сынайды?

17-25 қазан аралығында Нидерландтың Роттердам қаласында спорттық гимнастикадан 54-ші әлем чемпионаты өтеді. Қазақстан құрамасы байрақты бәсекеге алты спортшымен қатысады.

Әлем біріншілігі Rotterdam Ahoy аренасында ұйымдастырылады. Бұл кешенде чемпионат бұған дейін 2010 жылы өткен.

Қазақстан намысын мына гимнастар қорғайды:

• Нариман Құрбанов
• Милад Карими
• Дмитрий Патанин
• Ильяс Азизов
• Нұрлан Ыдырысов
• Роман Хегай

Чемпионатта 14 медаль жиынтығы сарапқа салынады. Сонымен қатар, жарыс барысында 2028 жылы Лос-Анджелесте өтетін Олимпиада ойындарына арналған алғашқы командалық жолдамалар ойнатылады.

Халықаралық гимнастика федерациясы мен Халықаралық Олимпиада комитетінің іріктеу тәртібіне сәйкес, көпсайыста командалық финалға шыққан ерлер мен әйелдер арасындағы үздік үш құрама бес спортшыдан тұратын командасымен Олимпиадаға жолдама алады.

Қалған тоғыз командалық жолдама 2027 жылы Қытайда өтетін әлем чемпионатында сарапқа салынады.

Біздің серіктес: Sport12kz