11.08.2025
Дүниежүзілік ойындарда джиу-джитсудан Сейілхан Болатбек қола медаль алды
Фото: Спортты дамыту дирекциясы
Қытайдың Чэнду қаласында өтіп жатқан XII Дүниежүзілік ойындарында джиу-джитсудан не-ваза бөлімі бойынша Сейілхан Болатбек (77 келі) қола жүлдегер атанды, деп хабарлайды Sport12.kz.
Отандасымыз 3-орын үшін таласта канадалық Майкл Шиханды 2:0 есебімен тізе бүктірді.
Осылайша отандастарымыз үшін Дүниежүзілік ойындарда джиу-джитсудан сайыс аяқталды.
10 тамызда джиу-джитсудан файтинг бөлімі бойынша 69 келіде Жәнібек Әбу-Бәкір чемпион атанса, 77 келідегі Нұрсұлтан Дүйсенқұлов күміс жүлде және 62 келіде Аслан Қанатбек қола жүлдені иемденген болатын.
Сондай-ақ ел құрамасынан каратэден 50 келідегі Мөлдір Жаңбырбай күміс жүлдеге ие болған еді.
Отандастарымыз аталған жарысқа 1993 жылдан бері қатысып келеді. Қазірге дейін олар 6 алтын, 4 күміс, 7 қола жүлде алды.
Қазақстандық спортшылар 2022 жылы АҚШ-тың Алабама штатының Бирмингем қаласында 1 алтын, 2 күміс, 1 қола медальмен әзірге жоғары көрсеткішке қол жеткізді.
Биыл жарыс 34 спорт түрінен өтіп, 253 медаль жиынтығы сарапқа салынады. Айтулы додаға 17 тамызға дейін 114 елден 4 000 спортшы қатыспақ.
Біздің серіктес: Olimpbet қосымшасын пайдалан
