Шымкентте нысана көздеуден Азия чемпионаты өтеді

Шымкент қаласында 16-30 тамыз күндері нысана көздеуден және стенд атудан Азия чемпионаты өтеді, деп хабарлайды Sport12.kz.

ҚР Туризм және спорт министрлігінің хабарлауынша, он алтыншы мәрте жалауын көтеретін құрлықтық додада Бахрейн, Вьетнам, Гонконг, Үндістан, Қатар, Қытай, Кувейт, Малайзия, БАӘ, Оман, Сауд Арабиясы, Сингапур, Оңтүстік Корея, Жапония сынды 26 мемлекеттен 800-ден астам спортшы қатысады.

Жарыс барысында жасөспірімдер, жастар мен ересектер арасында жүлделер сарапқа салынады. Спортшылар екі апта бойы тапанша, винтовка, жылжымалы нысана көздеу, стенд ату сайыстары бойынша өзара бақ сынайды. 

Азия біріншілігінде 700-ден астам медаль сарапқа салынады. Нысана көздеу бағдарламасында спортшылар пневматикалық тапанша (10 м), тапанша (25 және 50 м), винтовка (10 және 50 м), сондай-ақ жылжымалы нысана көздеуден жекелей және командалық сындарда сайысқа түседі. Ал стенд атуда трап, скит, скит-микс, трап-микс, дубль, жекелей және командалық бәсекелер өтеді.

Айта кетерлігі, мергендер додасына Халықаралық нысана көздеу федерациясының (ISSF) президенті Лучано Росси, Азия нысана көздеу қауымдастығының (ASC) президенті шейх Салман әл-Сабах, Араб елдері және Кувейттің нысана көздеу федерациясының президенті Дуайч Алотайби, ISSF бас хатшысы Александр Никотра Сент-Джеймс қатысады.

Біздің серіктес: Sport12kz