Жансая Әбдумәлік Бибісара Асаубаева төңірегіндегі жағдайға қатысты пікір білдірді

Қазақстандық гроссмейстер Жансая Әбдумәлік соңғы уақытта шахматшы Бибісара Асаубаеваға қатысты туындаған пікірталастарға көзқарасын білдірді.

Ол Instagram парақшасында оқырмандардың сауалдарына жауап бере отырып, бұл мәселеде белгілі бір тарапты қолдауға ниетті емес екенін айтты.

Жансаяның сөзінше, жеке адамдар арасындағы келіспеушіліктен бұрын, мұндай жағдайлардың қазақстандық шахматтың абыройына тигізетін әсері маңыздырақ.

Гроссмейстердің пікірінше, шахматқа қатысы жоқ жұртшылық спорттағы жетістіктерден гөрі дау-дамайды жиі көрсе, уақыт өте келе шахматты интеллектуалды ойын емес, жанжалмен байланыстырылатын орта ретінде қабылдауы мүмкін.

Оның айтуынша, мұндай ахуал демеушілер мен серіктестердің қызығушылығына да кері әсер етеді. Соның салдарынан жас шахматшылардың дамуына бағытталатын мүмкіндіктер азаюы ықтимал.

«Белгілі спортшылар қандай жағдайда да өз жолын табады. Алайда жас әрі дарынды шахматшылар мұндай жағдайдан көбірек зардап шегуі мүмкін. Қоғам назарындағы әр адам өз мүддесін ғана емес, айтқан сөзі мен жасаған әрекетінің бүкіл шахмат қауымдастығына қалай ықпал ететінін де ескеруі қажет», – деді Әбдумәлік.

Сондай-ақ ол спортқа инвестиция салуға дайын компаниялар мен серіктестер тұрақты жанжалдар орын алатын ортадан біртіндеп алшақтайтынын атап өтті.

Біздің серіктес: Olimpbet қосымшасын пайдалан