Қазақстандық пауэрлифтер Гүзәл Ергешева Англияда қайтыс болды

Қазақстандық пауэрлифтинг шебері Гүзәл Ергешева 8 тамызда Англияда дүниеден өтті. Ол Ұлыбританияда жолдасымен бірге тұрған.

Спортшының қайтыс болғанын оның 30 жылға жуық уақыттан бері араласқан жақын құрбысы, тележүргізуші Әдель Оразалинова әлеуметтік желідегі парақшасында жазды.

Оразалинованың айтуынша, Ергешева түнде ұйықтап жатқан жерінде көз жұмған. Қайғылы жағдайдың алдында ол жолдасының туыстарымен бірге уақыт өткізіп, кейін құрбысымен жүздескен. Сол кезде спортшы күнінің жақсы өткенін айтып, алдағы жоспарларымен бөліскен.

«Ол өмірден жақындарының махаббатына бөленіп, өзін бақытты сезініп, көздеген мақсатына жеткен, жарқын әрі жаңа жоспарлары бар жан ретінде өтті», – деп жазды Оразалинова.

Қазір Гүзәл Ергешеваның туыстары оның денесін Қазақстанға жеткізуге дайындалып жатыр. Марқұмды елге әкеліп, жерлеу рәсімін ұйымдастыру көзделген.

Әдель Оразалинова Ұлыбританиядан Қазақстанға мәйіт жеткізу тәртібін білетін адамдардан кеңес сұрап, елдің консулдығымен байланыс орнатуға көмектесуді өтінді.

Гүзәл Ергешева халықаралық аренада Қазақстанның атынан өнер көрсеткен. 2017 жылы Канадада бойы аласа спортшылар арасында өткен әлем чемпионатында топ жарып, алтын медаль иеленген.

Біздің серіктес: Sport12kz