Аты аңызға айналған баскетболшы әрі бапкер дүниеден өтті

Баскетболдан НБА-ның әйгілі бапкері Дон Нельсон 86 жасында қайтыс болды. Бұл туралы оның бұрын жаттықтырған «Golden State Warriors» клубы хабарлады.

Дон Нельсон – НБА тарихындағы ең танымал бапкерлердің бірі. Ол баскетболда өзгеше ойын үлгісін қалыптастырып, командаларына тың тәсілдер енгізуімен ерекшеленді.

Нельсонның спорттағы жолы баскетболшы ретінде басталған. Ол «Boston Celtics» командасында ойнап, НБА чемпионатын бес рет жеңіп алған.

Кейін бапкерлікке ауысып, бірнеше команданы жаттықтырды. Оның командалары НБА-да ірі жетістіктерге жетті. Нельсон үш рет маусымның үздік бапкері атанды.

Ол НБА тарихында үш түрлі командамен кемінде 250 жеңіске жеткен екі бапкердің бірі. Ал жалпы жеңістер саны бойынша лига тарихында екінші орында тұр.

Дон Нельсон 2012 жылы баскетболға сіңірген еңбегі үшін НБА-ның Даңқ залына енгізілді. Бұл – баскетболдағы ең жоғары марапаттардың бірі.

Нельсонның қайтыс болғанына байланысты «Golden State Warriors» клубы мен НБА басшысы Адам Сильвер оның отбасы мен жақындарына көңіл айтты.

Біздің серіктес: Sport12kz