Жүлде қоры 4,75 млн доллар:«Болашақ ойындары – 2026» мәресіне жетті

Астанада 12 күн бойы өткен «Болашақ ойындары – 2026» халықаралық турнирі мәресіне жетті.

29 шілдеде басталған жарысқа әлемнің 50-ден астам елінен 800-ден астам қатысушы келді. Спортшылар елорданың төрт нысанында сегіз дисциплина бойынша бақ сынады. Турнирде 108 команда жүлде үшін сынға түсіп, жалпы жүлде қоры 4,75 млн долларды құрады.

Жарыс барысында спортшылар цифрлық ойындар мен дәстүрлі спортты біріктіретін фиджитал форматта өнер көрсетті. Бұл форматта қатысушылар алдымен виртуалды ортада бәсекеге түсіп, кейін нақты спорт алаңында өз шеберлігін көрсетті.

Қазақстан атынан қатысқан командалар барлық сегіз дисциплинада бақ сынады. Отандық спортшылар арасындағы ең жоғары нәтижені Team KZ командасы көрсетті. Қазақстандықтар Phygital Shooter (CS2) дисциплинасында чемпион атанды.

«Болашақ ойындары – 2026» аясындағы жарыстарды тамашалау үшін спорт нысандарына 29 мыңға жуық көрермен жиналды.

Осылайша, Астана фиджитал-спорттан халықаралық деңгейдегі ірі жарысты алғаш рет қабылдап, 12 күн бойы әлемнің түкпір-түкпірінен келген спортшыларды бір алаңда тоғыстырды

Біздің серіктес: Sport12kz