Бибісара Асаубаева бастаған қазақстандық шахматшылар Дүниежүзілік олимпиадада бақ сынайды

Қазақстан құрамасының 2026 жылғы Дүниежүзілік шахмат олимпиадасына қатысатын құрамы анықталды. Биылғы басты командалық дода 16–27 қыркүйек аралығында Самарқандта өтеді.

Әйелдер құрамасында Бибісара Асаубаева, Алуа Нұрман, Меруерт Камалиденова, Елназ Қалиахмет және Зарина Нұрғалиева өнер көрсетеді. Команда капитаны – Павел Коцур.

Ашық секцияда Қазақстан намысын Денис Махнев, Жандос Ағманов, Даниял Сапенов, Сауат Нұрғалиев және Алдияр Ансат қорғайды. Капитан – Әнуар Исмағамбетов.

Бұл Олимпиада Елназ Қалиахмет, Зарина Нұрғалиева және Даниял Сапенов үшін ерекше болмақ. Үш шахматшы да Дүниежүзілік шахмат олимпиадасында алғаш рет бақ сынайды.

Айта кетейік, 2024 жылы Будапештте өткен Олимпиадада Қазақстанның әйелдер құрамасы күміс жүлде иеленген еді. Осылайша ұлттық команда Самарқандтағы додаға Олимпиаданың қазіргі вице-чемпионы ретінде қатысады.

Біздің серіктес: Sport12kz