Бибісара Асаубаева Cairns Cup турнирінде үшінші рет тең түсті

Қазақстандық шахматшы Бибісара Асаубаева АҚШ-тың Сент-Луис қаласында өтіп жатқан Cairns Cup 2026 жарысының үшінші турында америкалық Элис Лимен ойнап, партияны тең аяқтады.

Қара түспен ойнаған Асаубаева қарсыласымен ұпай бөлісті. Осы нәтижеден кейін қазақстандық гроссмейстердің қоржынында 1,5 ұпай бар. Ол турнирдегі алғашқы үш кездесуінің бәрінде де тең нәтиже тіркеді.

Бибісара Асаубаева бұған дейін украиналық Анна Музычукпен және үндістандық Вайшали Рамешбабумен тең түскен.

Үш турдан кейін турнир кестесінде Тань Чжунъи мен Элис Ли 2,5 ұпайдан жинап, көш бастап тұр. Үндістандық Дивья Дешмухтың еншісінде 2 ұпай бар.

Ал Бибісара Асаубаева 1,5 ұпаймен төртінші орынды бөлісіп тұрған шахматшылар қатарында. Онымен бірге бұл көрсеткішке Анна Музычук, Карисса Ип және Ставрула Цолакиду ие.

Cairns Cup жарысында қазақстандық шахматшыны тағы алты партия күтіп тұр. Биылғы турнирдің жүлде қоры 250 мың долларды құрайды.

Біздің серіктес: Sport12kz