Қазақстандық ауыр атлеттер Азия чемпионатында 20 медаль жеңіп алды

Ташкентте жастар мен жасөспірімдер арасында өткен ауыр атлетикадан Азия чемпионатында Қазақстан құрамасы 20 медаль жеңіп алды.

Қазақстандық зілтеміршілер құрлық додасында 8 алтын, 5 күміс және 7 қола жүлде иеленді.

Жастар арасындағы (YOUTH) бәсекеде отандастарымыз 4 алтын, 1 күміс және 3 қола медаль алса, юниорлар (JUNIOR) 3 алтын, 2 күміс және 3 қола жүлдеге қол жеткізді. Ал MASTERS санатында Қазақстан қоржынына 1 алтын, 2 күміс және 1 қола түсті.

Снежана Кашкарова жарыста екі жас санатында да алтын медаль жеңіп, Қазақстанның ең нәтижелі спортшыларының біріне айналды. Бейбарыс Ерсейіт те екі санатта жүлдеге ілікті.

Осылайша, Қазақстан құрамасы былтырғы нәтижесін жақсартты. 2025 жылы Астанада өткен Азия чемпионатында отандық ауыр атлеттер 7 алтын, 4 күміс және 6 қола, жалпы 17 медаль жеңіп алған еді

Біздің серіктес: Sport12kz