Бибісара Асаубаева Cairns Cup турнирінде жүлдеге ілікті

Қазақстандық шахматшы Бибісара Асаубаева АҚШ-тың Сент-Луис қаласында өткен Cairns Cup-2026 супертурнирін үшінші орынмен аяқтады.

Соңғы, тоғызыншы турда отандасымыз үндістандық Хампи Конеруге қарсы ойнап, партияны тең нәтижемен аяқтады. Асаубаева бұл кездесуде ақ фигураларды қолданды.

Осылайша қазақстандық шахматшының қоржынына 5 ұпай түсті. Бұл нәтиже оған жарыстың қола жүлдесін алуға мүмкіндік берді. Үшінші орын үшін Асаубаеваға америкалық Кларисса Ип те бәсекелес болды. Екі шахматшының ұпайы бірдей болғанымен, қосымша көрсеткіштер бойынша Бибісара жоғары орналасты.

Қазақстандық шахматшы жүлдесі ретінде 35 мың АҚШ долларын иеленді.

Cairns Cup-2026 жарысының жеңімпазы Қытай өкілі Тань Чжунъи болды. Ол 6,5 ұпай жинап, 65 мың долларлық бас жүлдені қанжығалады. Екінші орынға 6 ұпаймен америкалық Элис Ли жайғасты. Оның сыйақысы — 50 мың доллар.

Cairns Cup-2026 қорытындысы:

1. Тань Чжунъи (Қытай) — 6,5 ұпай, $65 000

2. Элис Ли (АҚШ) — 6 ұпай, $50 000

3. Бибісара Асаубаева (Қазақстан) — 5 ұпай, $35 000

4. Кларисса Ип (АҚШ) — 5 ұпай, $35 000

5. Анна Музычук (Украина) — 4,5 ұпай, $13 667

6. Дивья Дешмукх (Үндістан) — 4,5 ұпай, $13 667

7. Ставрула Цолакиду (Грекия) — 4,5 ұпай, $13 667

8. Хампи Конеру (Үндістан) — 3,5 ұпай, $9 000

9. Александра Костенюк (Швейцария) — 3 ұпай, $8 000

10. Вайшали Рамешбабу (Үндістан) — 2,5 ұпай, $7 000

Жарыстың жалпы жүлде қоры 250 мың АҚШ долларын құрады.

Біздің серіктес: Sport12kz