Елордалық шабандоздар Дүниежүзілік көшпенділер ойындарына жолдама алды

Алматыдағы Орталық ипподромда бәйге түрлерінен Қазақстан чемпионатының іріктеу кезеңі өтті. Жарыста елордалық спортшылар жорға жарыстан 9 шақырымдық қашықтықта үздік нәтиже көрсетіп, алтын және күміс жүлдені иеленді.

Бәсеке қорытындысында «Экспресс Лок» атты сәйгүлік бірінші болып мәреге жетіп, жеңімпаз атанды. Ал «Каратал» екінші орынға жайғасты. Жорға жарысына барлығы тоғызға жуық спортшы қатысты.

Жарыста 13 жастағы жас шабандоз да жақсы нәтиже көрсетті. Командаға жақында қосылғанына қарамастан, ол алғашқы жарыстарының бірінде-ақ жүлдеге ілігіп, екінші орын алды.

Жаттықтырушы әрі чемпион Алия Тоқтасынованың айтуынша, бұл жарыстың команда үшін маңызы ерекше болған.

«Бұл біз үшін аса маңызды жарыс болды. 9 шақырымдық қашықтықта сынға түсіп, бірінші және екінші орындарды иелендік. Әсіресе, 13 жастағы жас шабандозымыздың нәтижесі қуантады. Ол командамызға жақында ғана қосылғанына қарамастан, жақсы нәтиже көрсетті. Осы жетістіктің арқасында Дүниежүзілік көшпенділер ойындарына жолдама алдық. Ендігі басты мақсатымыз – тыңғылықты дайындалып, алдағы додада Астана мен Қазақстанның намысын абыроймен қорғау», – деді Алия Тоқтасынова.

Елордалық команда келесі жарысын 29 тамызда Алматыдағы Nomad Arena ипподромында өткізеді. Бұл жолы спортшылар жорға жарыстан 5 шақырымдық қашықтықта бақ сынайды.

Одан кейін команда Қырғызстанға аттанып, 31 тамыз бен 6 қыркүйек аралығында өтетін Дүниежүзілік көшпенділер ойындарына қатысады. Байрақты бәсекеде елордалық шабандоздар жорға жарыстан 11 шақырымдық қашықтықта сынға түседі.

Біздің серіктес: Sport12kz