Астанада муайтайдан халықаралық шеберлік сағаты өтіп жатыр

Қазақ ұлттық спорт университетінде Қазақстан мен Таиланд спортшылары мен жаттықтырушыларын біріктірген муайтайдан халықаралық шеберлік сағаты басталды.

Үш күнге жоспарланған шараға Таиландтан келген чемпиондар мен тәжірибелі мамандар қатысып, қазақстандық спортшыларға шеберлік сабақтарын өткізеді. Бағдарламада практикалық жаттығулармен қатар, муайтайдың дәстүрі мен мәдениетін таныстыруға арналған кездесулер де бар.

Іс-шараның ашылуына Таиланд Корольдігінің Қазақстандағы елшісі Пияпин Нийомреркс, ҚР Сыртқы істер министрінің орынбасары Әлібек Қуантыров, Туризм және спорт вице-министрі Серік Жарасбаев және KNUS ректоры Тұрсынзада Қуанғалиева қатысты.

«Қазақстанда муайтайды дамытуға ерекше көңіл бөлінеді. Қазақстанның муайтай федерациясы 1998 жылдан бері елімізде осы спорт түрін жүйелі түрде дамытып келеді. Қазақстандық муайтай мектебінің жоғары деңгейі спортшыларымыздың нәтижелерімен де дәлелденіп отыр. Қазақстанның ұлттық құрамасы әлемдегі муайтайдан жетекші бес құраманың қатарына тұрақты түрде кіреді», – деді Серік Жарасбаев.

Шеберлік сағаты аясында қатысушылар тәжірибелі нұсқаушылардан жаттығу әдістерін үйреніп, чемпиондармен кездеседі. Сондай-ақ «Вай Кру» рәсімі мен дәстүрлі «Муай Боран» өнерінің ерекшеліктерімен танысады.

Шара Қазақстан мен Таиланд арасындағы спорттық әрі мәдени байланысты нығайтуға бағытталған.

Біздің серіктес: Sport12kz