Қазақстандық велошабандоз халықаралық жарыста күміс жүлде жеңіп алды

Қазақстандық велошабандоз Денис Сергиенко Малайзияда өтіп жатқан SIOL International Mountain Bike Challenge-2026 жарысында күміс жүлдеге ие болды.

23 тамызда Кучинг қаласындағы Bukit Siol трассасында ерлер арасындағы Elite санатында Cross Country Olympic (XCO) бағдарламасы бойынша жарыс өтті. Жерлесіміз 19,2 шақырымдық қашықтықты 1 сағат 9 минут 16 секундта бағындырып, екінші орын алды. Сергиенко жеңімпаздан 43 секундқа қалып қойды.

Бұл жарыс UCI Mountain Bike Continental Series күнтізбесіне енгізілген. Биылғы дода 21-23 тамыз аралығында ұйымдастырылып, оған Малайзиядан бөлек бірқатар елдің спортшылары қатысты. 

Ал тағы бір жерлесіміщ Никита Галкин Men-U23 санатында төртінші орынға тұрақтады.

Айта кетейік, Денис Сергиенко биылғы Азия чемпионатында да XCO бағдарламасында күміс медаль жеңіп алған еді. Ташкентте өткен құрлық біріншілігінде ол 27,76 шақырымдық жарысты 1 сағат 24 минут 47 секундта аяқтаған.

Біздің серіктес: Sport12kz