Бибісара Асаубаева Франциядағы супертурнирдің чемпионы атанды

Қазақстандық шахматшы Бибісара Асаубаева Францияның Сен-Тропе қаласында өтіп жатқан WR Women’s Chess Tour 2026 супертурнирінің рапид кезеңінде жеңімпаз атанды, деп хабарлайды Sport12.kz.

Ширек финалда Асаубаева тай-брейкте неміс гроссмейстері Элизабет Петцті жеңді. Жартылай финалда қазақстандық шахматшы грузиялық Нино Бациашвилимен кездесті. Шешуші «Армагеддон» партиясында қара фигуралармен тең түскен Бибісара финалға жолдама алды.

Финалда оның қарсыласы украиналық Мария Музычук болды. Алғашқы партияда Асаубаева қара фигуралармен жеңіске жетсе, екінші партияда да басымдық танытып, қарсыласын жеңді.

Нәтижесінде Бибісара 5,5 ұпай жинап, WR Women’s Chess Tour 2026 Europe рапид кезеңінің чемпионы атанды.

Бүгін турнирдің блиц кезеңі басталады. Онда ойыншылардың жеребесі қайта жасалып, сегіз шахматшы екінші жүлде үшін бақ сынайды.

Біздің серіктес: Sport12kz