Мария Бровкова мен Ульяна Киселёва әлем чемпионатының финалына шықты 

Польшаның Познань қаласында байдарка мен каноэде ескек есуден ересектер арасындағы 51-ші әлем чемпионаты өтіп жатыр, деп хабарлайды Sport12.kz.

Әйелдер арасында каноэде 200 метрге жұптық жарыста Қазақстан командасы ақтық сынға шықты. Отандасымыз Мария Бровкова мен Ульяна Киселёва іріктеуде өз тобында мәреге 3-болып келді. Олардың уақыт көрсеткіші - 46.61 секунд. Бұл бағдарламаның жүлделері 29 тамызда Польша уақытымен сағат 16:10-да (Астана уақытымен 13:10-да) сарапқа салынады.

Еске сала кетейік, Мария мен Ульяна маусымда Түркістан қаласында өткен U23 жас санатында бірге өнер көрсетіп, 2 алтын медаль жеңіп алған. Ал Мария Бровкова - 23 жасқа дейінгі спортшылар арасында әлем чемпионы, тағы бірнеше дүркін жүлдегері.

Айта кетейік, Познаньдағы жарыс Мальта көліндегі есу арнасында өтіп жатыр. Қазақстан командасы сапында байдарка, каноэ және параканоэден ескек есуден 21 отандасымыз барды. Жарыс 30 тамызда аяқталады.

Біздің серіктес: Sport12kz