Қазақстандық ескек есушілер әлем чемпионатының финалына шықты

Польшаның Познань қаласында байдарка мен каноэде есуден өтіп жатқан әлем чемпионатында Қазақстан құрамасының екі спортшысы финалға жолдама алды.

Сергей Емельянов каноэде 200 метрге жарыстың шешуші кезеңінде бақ сынайды. Қазақстандық спортшы жартылай финалда 42,99 секунд нәтиже көрсетіп, өз тобында үшінші орын иеленді.

Ал Мария Бровкова каноэде 500 метр қашықтықтағы жарыстың финалына шықты. Ол жартылай финалда 2:19,31 уақыт көрсеткішімен екінші болып мәреге жетті.

Бұған дейін Бровкова Ульяна Киселевамен бірге каноэде 200 метрге жұптық жарыстың финалына жолдама алған еді.

Сергей Емельянов 28 тамызда Астана уақытымен сағат 12:40-та, ал Мария Бровкова 29 тамызда 12:05-те финалда өнер көрсетеді.

Осылайша, Қазақстан құрамасының әлем чемпионатындағы финалдық жолдамалар саны әзірге үшеуге жетті. Познаньдағы жарыстың жартылай финалдық кезеңі әлі жалғасып жатыр.

Біздің серіктес: Sport12kz