Қазақстан жағажай волейболынан Азия чемпионатында Оманды жеңді 

Шанлода (Қытай) жағажай волейболынан Азия чемпионаты басталды. Құрлықтық біріншілікте Қазақстан құрамасының жұптары алғашқы ойындарын өткізді, деп хабарлайды Sport12.kz.

Ерлер арасында Сергей Богату мен Кирилл Гурин D тобында өнер көрсетіп жатыр. Алғашқы ойында қазақстандықтар ирандық Абольхассан Хакизаде мен Амир Али Галеновиден 0:2 (13:21, 15:21) есебімен жеңілді. Екінші кездесуде Богату мен Гурин Оман өкілдері Мазин Аль-Хашми мен Худ Аль-Джалабубиді 2:0 (21:12, 21:18) есебімен ұтты.

E тобында өнер көрсетіп жатқан Дмитрий Яковлев пен Абдулмажид Мохаммад екі кездесуде де жеңіліс тапты. Алдымен қазақстандық жұп жапониялық Такуми Такахаси мен Дзюмпэй Икедеге 0:2 (13:21, 17:21) есебімен жол берсе, кейін индонезиялық Бинтанг Акбар мен Софьян Рахманнан 0:2 (17:21, 15:21) есебімен жеңілді.

Әйелдер арасында Кристина Каримова мен Екатерина Рюхова C тобында бақ сынауда. Алғашқы кездесуде олар Филиппин өкілдері Хайлeм Прогелла мен София Пагареге 0:2 (13:21, 14:21) есебімен есе жіберді. Екінші ойында қазақстандықтар жапониялық Асами Шиба мен Рейка Муракамиден 0:2 (14:21, 14:21) есебімен жеңілді.

Лаура Қабылбекова мен Мерей Қожахмет F тобында өнер көрсетіп жатыр. Қазақстандықтар алғашқы кездесуінде жапониялық Рэн Мацумото/Нон Мацумото жұбына 0:2 (14:21, 12:21) есебімен жол берді. Екінші кездесуде олар Қытай өкілдері Цао Шутин мен Дун Цзеге 0:2 (2:21, 12:21) есебімен есе жіберді.

Біздің серіктес: Sport12kz